مكتوبة عشان تتقري قبل ما تدفع، مش عشان نختفي وراها بعد كده. لو فيه حاجة مش واضحة، اسأل قبل ما تشتري.
EditFast إضافة بتشتغل جوه Adobe Premiere Pro. الاشتراك بيديك حق استخدام الإضافة على عدد الأجهزة اللي دفعت عليه، طول مدة الاشتراك.
كل الباقات بتفتح التمنتاشر أداة كلها. مفيش باقة ناقصة وباقة كاملة — الفرق في المدة بس، وفي عدد الأجهزة لو زوّدته.
الإضافة بتشتغل على بريمير برو ٢٠٢٢ فأحدث، على ويندوز وعلى الماك، بنفس الأدوات ونفس الاشتراك على الاتنين.
الدفع بيتم بالتحويل — إنستاباي أو محفظة. بعد ما تبعت الطلب، بنراجع التحويل ونفعّل الحساب. التفعيل بياخد لحد ٣٠ دقيقة في الأوقات العادية.
ملف الإضافة بينزل من ساعة ما تعمل الطلب، من غير ما تستنى التفعيل. الملف لوحده مش بيشتغل من غير اشتراك مفعّل، فتنزيله بدري مش بيدّي حد حاجة.
مفيش تجديد تلقائي ومفيش خصم من كارت. لما المدة تخلص، الإضافة بتقف وإنت اللي بتقرر تجدّد أو لأ.
أي كوبون خصم بيتحسب على الاشتراك نفسه. الأجهزة الزيادة وكريديت EditFast AI بيتحسبوا بسعرهم.
لو فيه مشكلة تقنية بتمنعك تستخدم الإضافة، كلّمنا الأول. أغلب المشاكل بتتحل في نفس اليوم.
لو مقدرناش نحلّها، بنرجّعلك فلوسك بالكامل خلال ٤٨ ساعة من أول ما تدفع. ده وعد صريح مش استثناء.
الاسترجاع بيرجع بنفس طريقة الدفع، وبياخد المدة اللي البنك أو المحفظة بتاخدها.
استبدال الجهاز مجاني وفي أي وقت: من صفحة حسابك تشيل الجهاز القديم وتسجّل دخول على الجديد. مش محتاج تكلّمنا.
الاشتراك بيشتغل على جهاز واحد. تقدر تزوّد لحد ٦ أجهزة، وكل جهاز زيادة بنص سعر الاشتراك.
الجهاز بيتحدد ببصمة مبنية على اسم الجهاز واسم المستخدم والنظام، ومتحوّلة لرقم. مش بنجمع حاجة عن جهازك غير كده.
مشاركة الحساب مع حد تاني بره العدد اللي دفعت عليه بتخالف الشروط دي، وبتدّينا حق نوقف الاشتراك من غير استرجاع.
فيديوهاتك مش بتسيب جهازك. القص والمونتاج والتحليل كله بيحصل على جهازك، ومفيش أي ملف فيديو بيترفع لأي حتة.
فيه استثناء واحد لازم تعرفه: التفريغ النصي. عشان الكلام يتحوّل لنص، لازم الصوت يتبعت لخدمة تفريغ.
ولما تطلب حاجة من EditFast AI، اللي محتاجه للطلب ده — رسالتك، ولقطات ثابتة من الفيديو، والكلام المفرّغ، والصور اللي بتبعتها — بيعدّي على سيرفرنا لخدمة الذكاء الاصطناعي اللي بترد. مفيش ملف فيديو بيتبعت، ومبنحتفظش بأي حاجة منهم، والشاتات بتتحفظ على جهازك إنت.
اللي بنحتفظ بيه عن حسابك: الإيميل، الاسم والموبايل لو كتبتهم، طلبات الدفع وصور الإيصالات، الأجهزة المسجّلة، عدد دقايق التفريغ وكريديت EditFast AI المستخدمة، وعدد مرات استخدام كل أداة في البلاجن — أرقام بس، من غير أي حاجة من مشاريعك. بس.
لو كنت حاطط مفتاح خدمة في نسخة قديمة من البلاجن، بيفضل على جهازك إنت، جوه مجلد الإعدادات، ومبيوصلناش خالص.
زيارات الموقع بنعدّها بأنفسنا على سيرفرنا: أنهي صفحات اتفتحت ومنين جايين، من غير ما يتخزّن أي IP ومن غير تحليلات من طرف تالت.
وقت ما بنعمل إعلانات، الموقع بيحمّل بكسل المنصة اللي بنعلن عليها — تيك توك أو ميتا — في كل الصفحات برّه لوحة الإدارة. البكسل ده بتاعهم مش بتاعنا: ممكن يحط كوكيز، وبيقولهم إن فيه زيارة أو طلب حصل وبكام، عشان نعرف الإعلان نجح ولا لأ. مبيوصلهوش اسمك ولا موبايلك ولا تفاصيل الدفع ولا أي حاجة من شغلك.
فيه حاجة واحدة عنك بتروح معاه، وبس بعد ما يبقى ليك حساب: بصمة مشفّرة لإيميلك (SHA-256). بتتحسب جوّه المتصفح بتاعك إنت، واللي بيطلع من جهازك هو البصمة مش الإيميل. المنصة بتقارنها بالبصمات اللي عندها عشان تعرف هل اللي اشترى هو اللي شاف الإعلان، ومش بتقدر ترجّعها إيميل تاني. ولو مش عايز ده كله، اقفل المتتبّعات من المتصفح — البصمة هتقف كمان، والموقع هيشتغل زي ما هو بالظبط.
بلدك بتتحدّد من عنوان الـ IP بتاعك، جوّه سيرفرنا إحنا، بقاعدة بيانات مجانية محفوظة عندنا (IP to Country Lite من DB-IP، رخصة CC BY 4.0). ده بيحدّد العملة اللي تشوفها واللغة اللي يفتح بيها الموقع، وبس. عنوانك مبيتبعتش لحد عشان كده — البحث بيحصل عندنا بالكامل.
لو عايز تمسح حسابك وكل بياناته، كلّمنا وهنمسحه.
التفريغ النصي جاي مع أي اشتراك، من غير ما تشتري حاجة ولا تحط أي مفتاح، في حدود استخدام يومي عادل أكتر بكتير من اللي أي مونتير محتاجه في يوم. الحد ده موجود بس عشان محدش يستنزف الخدمة.
دقايق التفريغ مبقتش بتتباع. الدقايق اللي اشتريتها قبل كده مش هتضيع: بتفضل على حسابك، وبتتستخدم لو عدّيت الحد اليومي في أي يوم.
الاستخدام اليومي بيتحسب بالمدة اللي خدمة التفريغ نفسها بتقول إنها اتعالجت، مش باللي البلاجن بيدّعيه.
لو خدمة التفريغ الأساسية وقفت، خدمة تانية بتكمّل لوحدها. ولو الاتنين وقفوا، التفريغ بيستنى لحد ما يرجعوا.
المؤثرات الصوتية (ElevenLabs) ودوّارة البي-رول (Pexels) شغّالين عن طريق سيرفرنا بمفاتيحنا إحنا — مش محتاج تحط أي مفتاح. اللي بيعدّي علينا هو اللي الطلب محتاجه بس: وصف الصوت، أو كلمات البحث.
المؤثرات الصوتية الجديدة ليها حد يومي عادل لكل حساب، وأي صوت اتعمل قبل كده بيتحفظ ومبيتحسبش تاني. ولو كنت حاطط مفتاح بتاعك في نسخة قديمة، بيتستخدم هو دايمًا.
لو خدمة منهم غيّرت حدودها أو قفلت، ده خارج عن إيدينا — هنقولك ونشوف بديل.
الأداة بتعدّل على التايملاين بتاعك. كل عملية بتوريك هتعمل إيه قبل ما تنفّذها، وكلها بتترجع بـCtrl+Z جوه بريمير.
برضه: خلّي عندك نسخة من مشروعك قبل أي شغل كبير. ده كلام صحيح مع أي أداة بتلمس التايملاين، مش معانا بس.
مسؤوليتنا في أي حالة محدودة بالمبلغ اللي دفعته في آخر اشتراك. مش مسؤولين عن خسارة شغل، ولا عن وقت ضاع، ولا عن نتيجة تفريغ غلط.
دقة التفريغ العربي بتوصل حوالي ٨٥٪ في الظروف العادية، وبتقل مع التسجيل الوحش أو الكلام المتداخل. الرقم ده مكتوب في الموقع قبل ما تدفع، ومش عيب لو النتيجة محتاجة مراجعة.
الأسعار ممكن تتغير. اللي دفعت بسعر، بيفضل على السعر ده لحد ما مدته تخلص.
لو غيّرنا الشروط دي بشكل جوهري، هنكتب التاريخ تحت. الاستمرار في استخدام الأداة بعد التغيير معناه إنك موافق عليه.
ممكن نوقف حساب بيخالف الشروط دي — مشاركة مفتاح، أو محاولة تعديل الأداة لتخطّي الاشتراك — من غير استرجاع.
أي حاجة — مشكلة، استرجاع، سؤال قبل ما تشتري — كلّمنا على الواتساب أو على إنستاجرام. بنرد في نفس اليوم غالبًا. العنوان والرقم في صفحة التواصل.
آخر تحديث: ٤ أكتوبر ٢٠٢٦
